ភ្នំពេញ៖ ក្នុងពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅថ្ងៃទី២៦ ដល់ថ្ងៃទី២៨ ខែវិច្ឆិកា ឆ្នាំ២០២៣ មានទូកអុំ និងទូកចែវជាង ៣០០ និងមានកីឡាករជាង ២ម៉ឺននាក់ចូលរួមក្នុងពិធីប្រណាំងទូក «ង» ខ្នាតជាតិ និងខ្នាតអន្តរជាតិ។ នេះបើតាមការបញ្ជាក់ពីអនុរដ្ឋលេខាធិការក្រសួងអប់រំ យុវជន និងកីឡា និងជាអនុប្រធានអចិន្ត្រៃយ៍ អនុគណៈកម្មការបច្ចេកទេសនៃគណៈកម្មាធិការជាតិរៀបចំបុណ្យជាតិ-អន្តរជាតិ លោក ប៊ូ ជុំសេរី ដែលទីភ្នាក់ងារសារព័ត៌មានកម្ពុជា AKP បានដកស្រង់។

លោក ប៊ូ ជុំសេរី បានបញ្ជាក់ថា ក្នុងចំណោមទូកសរុបចំនួន ៣៣៧ មានទូកអុំបុរស ១៥៨ទូក ទូកចែវបុរស ៤២ទូក (ទូកចែវនារី ១ទូក) ទូកខ្នាតអន្តរជាតិបុរស ១៣៤ទូក (ទូកខ្នាតអន្តរជាតិនារី ២ទូក) កម្លាំងអុំបុរស ១៦ ៤៨៧ នាក់ (កម្លាំងអុំនារី ៨៧នាក់) កម្លាំងត្រៀមបុរស ២ ៧៦៥នាក់ និងកម្លាំងត្រៀមនារី ៧៨នាក់ កម្លាំងសរុប ២០ ៤១៧នាក់។ ចំនួនទូកអុំនៅឆ្នាំនេះមានការកើនឡើងបើធៀបនឹងឆ្នាំ២០១៩ កន្លងមក បន្ទាប់ពីខកខានរយៈពេល ៣ឆ្នាំជាប់ៗគ្នា ដោយសារតែវិបត្តិកូវីដ-១៩ និងកម្ពុជាជាប់ធ្វើជាប្រធានអាស៊ានឆ្នាំ២០២២។

លោក ប៊ូ ជុំសេរី បានបញ្ជាក់បន្ថែមថា ខេត្តដែលបញ្ជូនទូកមកប្រកួតច្រើនជាងគេគឺខេត្តកណ្តាល ដែលមានរហូតដល់ ១០១ទូក។ បន្ទាប់មកខេត្តព្រៃវែង មានទូកសរុបចំនួន ៥៦ទូក ហើយរាជធានីភ្នំពេញមានទូកសរុប ៤៤ទូក។

ក្រោយបញ្ចប់ពិធីប្រណាំងទូក នៅពេលល្ងាចនឹងមានបណ្តែតប្រទីបរបស់ក្រសួង ស្ថាប័ន និងក្រុមហ៊ុន ចំនួន ៣០ប្រទីបនៅទន្លេចតុមុខព្រះបរមរាជវាំង ជាមួយនឹងការបាញ់កាំជ្រួច និងការប្រគុំតន្ត្រី ខណៈកងកម្លាំងជាង ១ម៉ឺននាក់នឹងនៅចាំការពារសន្តិសុខ សណ្តាប់ធ្នាប់ និងសុវត្ថិភាពជូនប្រជាពលរដ្ឋដែលមកដើរកម្សាន្តលេង៕